Turkic Studies Journal

Журнал туралы

"Turkic Studies Journal" (TSJ) – ашық қолжетімді рецензияланатын ғылыми журнал, ол Орталық Азияның түркі және шектес халықтарының мәдениеті, тарихы, тілі саласындағы шығыстану зерттеулерінің нәтижелерін, сондай-ақ Батыс мәдениетімен өзара байланысы арқылы қазіргі әлемнің ортақ өркениеттік қорын құрайтын бірегей Шығыс мәдениетін ашып көрсететін зерттеу нәтижелерін жариялайды.

Қазіргі түркітану ғылымы көптеген ғылымдарды біріктіреді, алайда түркітану негізгі анықтамасында тарихи және лингвистикалық білімдерге сүйенеді. Тарихи зерттеулер қоғам мен көшпелі мәдениет тарихына арналған, олар қытай, араб-парсы, батыс және тікелей түркі дереккөздеріне негізделеді, бұлардың қатарына әртүрлі графикалық жүйелермен жазылған түркі жазба ескерткіштері жатады. Түркі жазба ескерткіштері мәтінтану бірліктері ретінде қарастырылады, өйткені олар түркі халықтарының тарихы мен мемлекеттілігінің дереккөздері ғана емес, сонымен қатар оларда түркілердің дүниетанымы, идеологиясы мен мәдениеті, көшпенді және отырықшы өмір салты, ойлары мен толғаныстары көрініс тапқан. Түркітанудағы лингвистикалық аспект түркі тілдері жүйесінің қазіргі және сондай-ақ жазба ескерткіштерде көрініс тапқан тарихи даму үдерісін зерттеуге бағытталған.

Түркітану ғылымының кез келген аспектісін қайта қарастыру және зерттеу тарихи фактсіз, тарихи контекстісіз, нақты тарихи оқиғамен байланыстырмайынша мүмкін емес. Осы үдерісте ортағасырлық Қазақстан тарихының рөлі ерекше маңызды. Дәл осы орта ғасырларда ғұндардың, түркілердің Ұлы дала империялары, қимақ, оғыз, қыпшақ қағанаттары, Қарахан мемлекеті, Жошы ұлысы, Қазақ хандығы қалыптасты.

Орта ғасырлар – бұл мемлекеттік құрылымдардың біртұтас үдерісінің үздіксіз тізбегі, түркі тілінің жергілікті диалектілермен кіріккен, бүкіл мемлекеттің аумағында ортақ болған сәулет, өнер, әскери іс, киім, әшекейлер сәні мен құнды заттарды қалыптастырған мемлекеттік мәдениеттің түзілген уақыты.

Қазақстан Еуразия кеңістігінде ұланғайыр аумақты алып жатыр. Ол арқылы барлық халықтардың көші-қоны, ендік және бойлық бағыттағы керуен сауда жолдары өткен. Қазақстан әлемнің материалдық және рухани мәдениетінің көптеген жаңалықтарын таратушы әрі сақтаушы болған. Ежелгі заманнан бастап бұл кеңістік өркениеттердің тоғысатын торабы, пассионарлық қуаттың жиналып, ойкуменаның барлық бағыттарына таралатын орнына айналды. Ортағасырлық мәдениет, тарих, түркі халықтарының тілі олардың Қазақстанға – Орталық Азия мен Шығыстың орталықтандырушы субъектісі ретіндегі байланысы арқылы халықаралық кеңістікте жеткілікті зерттелмеген және бұл TSJ басылымы үшін маңызды айқындаушы фактор болып саналып, халықаралық ғылыми қауымдастықтың қызығушылығын тудырады.

Журналдың миссиясы – түркі халықтарының тарихи мәдениеті мен тілін зерттеудегі автохтонды ақпараттық олқылықтарды толтыру. "Turkic Studies Journal" –ортағасырлық түркі халықтарының тарихы мен археологиясы, олардың текстологиясы мен тілдері жөнінде, Қазақстан Республикасын тарихи тұрғыдан Орталық Азия мен Шығыстың  орталық субъектісі ретінде қарастыра отырып, түпнұсқа және аударма мақалалар жариялайтын Еуразия кеңістігіндегі жалғыз журнал. Сонымен қатар, журналдың жарияланымдық қызметі шығыстанудың өзекті мәселелері аясында халықаралық ғылыми ынтымақтастықты дамытуға бағытталған.

TSJ шығыстанушы, түркітанушы мамандарға және түркі халықтарының тарихын, археологиясын, тілін, мәтінтануын зерттеумен айналысатын жас ғалымдарға арналған.

Журнал ағылшын, қазақ, орыс тілдерінде мақалалар жариялайды.

Мерзімділігі – жылына 4 рет.

ISSN (print) 2664-5157

ISSN (online) 2708-7360

Қазақстан Республикасы Ақпарат және қоғамдық даму министрлігінде тіркелген: алғашқы тіркеуі 28.03.2019 № 17636-Ж; қайта тіркеуі 24.02.2021 (тіркеу куәлігі № KZ27VPY00032814).

CrossRef халықаралық агенттігі журнал мақалаларына DOI (сандық нысан идентификаторы) тағайындайды. Журналдың DOI-і: doi.org/10.32523/2664-5157tsj

Turkic Studies Journal ҚР ҒЖБМ Білім және ғылым саласында сапаны қамтамасыз ету комитетінің журналдар тізіміне енгізілген.

Журналдың индекстелуі: DOAJ (Directory of Open Access Journals),ERIH PLUS, РҒДИ, Google Scholar, Academic Resource Index (ResearchBib), EuroPub, Index Copernicus (ICI World of Journals), ROAD,BASE, Citefactor, EBSCO

Turkic Studies Journal журналының электронды нұсқалары Қазақстан Республикасы электронды кітапханаларының қорын қалыптастыру үшін «ҰМҒТСО» АҚ-на тапсырылады.

Журналдың қағаз нұсқалары Қазақстан Республикасының және шет мемлекеттердің кітапханаларына жіберіледі.

Шығарушы: “Л.Н. Гумилев атындағы Евразия ұлттық университеті” КеАҚ, Астана қ., Қазақстан Республикасы