«Хакас фольклоры» библиографиялық көрсеткіші

Аннотация

Рецензияланып отырған «Хакас фольклоры»
басылымы (құрастырушылары М.А.Аева, И.Н. Андреева, Е.Г.Караваева, Е.Л. Кривоносова,
Э.И. Торокова, О.П. Чочиева, жауапты құрастырушы – А.А. Ищенко) ХІХ ғасырдың
соңынан бастап 2022 жылға дейін орыс, хакас және әлемнің басқа тілдерінде хакас фольклоры туралы жарық көрген материалдардың библиографиялық көрсеткіші болып табылады. Хакас фольклорын зерттеу бағытында көп жұмыс тындырылған, сондықтан хакас фольклоры жөніндегі ақпаратты тұңғыш рет жинақтаған және жүйелеген бұл еңбек өте құнды дереккөз деп саналады.

Библиографиялық көрсеткіш алты негізгі бөлімнен тұрады. Олардың алғашқысы хакас фольклорының осыған дейін жарияланған шығармаларына арналған. Сондай ақ «Хакас фольклорын зерттеу», «Өнердегі хакас фольклоры», «Хакас фольклорының архивтердегі құжаттық материалдары», «Хакас фольклорының библиографиясы», «Қосымша көрсеткіштер» атты бөлімдер де көрсеткіштің негізгі құрылымын анықтайды.
Хакас фольклорын зерттеушілердің еңбектері жанрлар (мифтер, батырлық эпос, аңыздар, ертегілер, өлеңдер, т.б.) бойынша жіктеліп ұсынылған. С.П. Кадышев, П.В. Курбижеков секілді атақты жыршылар мен Н.Ф. Катанов, В.Е. Майногашева сияқты көрнекті ғалымдар туралы мәліметтер жеке берілген. Көрсеткішті әзірлеу
кезінде көптеген кітапханалардың қоры, электрондық каталогтары, мәліметтер базасы қарастырылған. Еңбек зерттеушілерге ыңғайлы болу үшін анықтамалық-іздеу аппаратымен қамтамасыз етілген.

100 дана таралыммен жарық көрген «Хакас фольклоры» қазірдің өзінде библиографиялық сирек құндылыққа айналып үлгерді.